शतक हुकलेल्या खेळाडूप्रत—

• दिनांक: २२ ऑक्टोबर २०२३
  भारताचा प्रमुख आधारस्तंभ फलंदाज विराट कोहली दिग्गज फलंदाज सचिन तेंडुलकर याच्या शतकांच्या विक्रमाशी बरोबरी करण्याच्या उंबरठ्यावर असताना बाद झाला. नव्वदीमध्ये रेंगाळलेला कोहली ९५ धावांवर खेळत असताना एकाच षटकाराने शतकाकडे उडी मारण्याचा त्याचा प्रयत्न फसला. मिडविकेटला एक सोपा झेल देऊन तो बाद झाला. तो नव्वदी पोहोचल्यापासून उत्कंठेने श्वास रोखून सामना पाहात असलेल्या त्याच्या चाहत्यांची दारूण निराशा झाली. एकीकडे आपल्या आवडत्या खेळाडूचे शतक नि विक्रम हुकला याचे वैफल्य आणि असा बेजबाबदार फटका मारून बाद झाल्याबद्दलचा राग व वैताग या दोहोंतून व्यक्त झालेली ही संमिश्र भावना.
  ---

  

  (कवि अनिल यांची क्षमा मागून...)
      
  आज अचानक विकेट पडे ॥ ध्रु.॥
  
  भलत्या वेळी भलत्या खेळी ।
  असतां मन शतकाकडे ॥
  
  बॅट फिरवितां तू मिडविकेटी ।
  एकाएकी झेल पडे ॥
  
  दचकुनि जागत जीव अचानक ।
  क्षणभर हार्ट हे थंड पडे ॥
  
  गूढ डिलिव्हरी तव नाकळुनि ।
  अघटित असे हे आज घडे ॥
  
  निसटुनि जाई संधीचा क्षण ।
  सदा असा आवेश नडे ॥
  
  - कवि तुंदिल
   
  - oOo -