बुधवार, २४ फेब्रुवारी, २०२१

मी पुन्हा येईन...

( सिद्धांत बेलवलकर या स्टॅंड-अप कमेडियनने त्याच्या एका सादरीकरणामध्ये खड्डेही ’मी पुन्हा येईन’ म्हणतात असा पंच घेतला. त्यावरुन स्फुरलेले हे विडंबन.)

मी पुन्हा येईन, मी पुन्हा येईन, मी पुन्हा येईन ॥धृ॥

पाऊस पडला, खड्डे झाले,
खड्ड्यांमध्ये तलाव झाले.
लोक चिडले, नेत्याला भिडले,
नेत्याचे आदेश निघाले

कामगार कामाला लागले,
डांबराची पिंपे घेऊन आले.
डांबर खडीचे मिश्रण ओतले,
तर खड्ड्यांतून आवाज आले... ॥१॥


घरात झुरळे फार झाली
ताटावर त्यांनी चढाई केली
जेवण्याचीही चोरी झाली
घरची मंडळी त्रस्त झाली

औषधे घेऊन माणसे आली
सांदीकोपर्‍यात चढाई केली
अखेरच्या झुरळाने माघार घेतली
खिडकीतून जाताना गर्जना केली...  ॥२॥


पाऊसपाणी ब्येस झालं
शिवारात पीक उभारलं
एका पाखराचं ध्यान गेलं
पर ते बुजगावण्याला भ्येलं

गावचं सांड पिकात घुसलं
शेतकर्‍याचं टकुरं फिरलं
हिरव्या फोकानं मजबूत हाणलं
पळता पळता ते डुरकलं... ॥३॥

कष्टानं पैसा मिळवला
नीट गुंतवून सांभाळला
मग गणपा रिटायर झाला
’श्रमसाफल्य’ बंगला बांधला

एके रात्री चोर आला
पाईपवरुन घरात शिरला
गणपाने पकडून ठेवला
ठाण्यावर नेताना म्हणाला... ॥४॥

पहिलीपासून गणिताला भ्यालो
तिसरीत पाच वर्षे अडकलो
क्लास लावले, रात्री जागलो
सार्‍या देवांच्या पाया पडलो

यावर्षी घनघोर लढलो, आणि
परीक्षेला लवकर पोचलो
पेपर लिहून बाहेर पडलो
जाताजाता सवयीने म्हटलो... ॥५॥

विनोद ऐकून विडंबन केले
कविला आकाश ठेंगणे झाले
फेसबुकवर टाकले, फॉरवर्ड केले
चार-दोन लाईकांचे भारे मिरवले

अहंकाराचे शिंग उगवले
काव्यसंमेलनात कवि शिरले
आयोजकांनी हाकलून लावले
बाहेर पडताना कवि पुटपुटले... ॥६॥

- oOo -


कोणत्याही टिप्पण्‍या नाहीत:

टिप्पणी पोस्ट करा